UBG-Nottuln - Präöterken

Präöterken

	Nen Präöterken vonne Pollitick
	(Äs ümmer: Sundagsmuorns, nao de Haugmiß, Jopp un Henrich, bi Oma Mia anne Thek!) Joseph: ... tje, un nu sall den Wahlkampf je würklick laupen, un se sin all an´t Verdeelen an: Plakate, Papeere un all düsse Aaperie! Heinrich: Moss wietten, den Bürger un de Bürgerin will't auk informeert sien, un dat is mangst Wunnerwiärks! Joseph: Wu datt dann? Papeer is Papeer Heinrich: Jüst so is´t. Leßte Dage gafft nen Siedde., de wass auk schön raud, un den Kandidaten schreew schön up, watt he so alls maakt heff! Ick heff mi schön wünnert. Joseph: Wünnert? Üörwer nen Flugblatt? Heinrich: Wisse doch: Ick heff mi't iärst in aller Ruhe döerliäsen, un hefft ümmer seggtt: Gued so, so is't. Dao staonn drin, wat de Jungs un Fraulüde vonne Bürgergemeinschaft all ümmers wullen: De Footgängerbrück anne Müelenstiege bi Hardenbiärgs. Is doch ne guede Idee, duerrt blaoß all so lang! Un dann staonn dao, dat de Gemeind'nich all Land up eenen Schlag verkaupen söll! Auck watt vonne Unabhängige Bürgergemeinschaft. Tje, un unner staonn up eenmaol, dat düt de Meinung vonne Ess-Pe-Deh waas! Joseph: Du wuss mi wull uppen Arm niemen, Heinrich. Dat is doch alls vonne UBG! Hebbt de dat nich all vöer teihn Jaohre seggt, un watt hebtt'se vonne Se-De-Uti un vonne Ess-Pe-Deh up de Unabhängigen druppburkt! Alls wass falschk, wat de saggen! Un nu is't up eenmaol richtig! Heinrich: Süh, dat is Parteipolitik! Du moß blaoß fleksiebel sien un dann ümmer den Wähler watt üm Muel schmeeren, dann büss du gued! Met Vernüll un klaren Kopp heff dat nicks te daohn! Joseph: Jau, de verlao't sick drup, dat den Bürger alls vergätt! Un dann kuemt'se und willt usse Stimmen hebben. Vöer teihn Jaohre hebbt's uss nich ankieken, un nu up eenmaol met usse Reeschopp de Kartuffeln nao Huese hen haalen! Nee, nee! Heinrich: Häss du eelicks auk de Plakate von de Ess-Pe-Deh seihn! De hangt nu graut met Beld an alle Laternenmasten. Düer Wiärks, Respekt! Joseph: Du büss nen ungebildeten Meeschken! Dat is doch den Biedrag vonne Ess-Pe-Deh tot Jubiläum vonne Französchke Revolution! Heinrich: Hö? Joseph: Jau, Rektor Beuys saggt doch inne Rektoratsscholle ümmer: In Frankriek hebbt'se 1789 roopen, "a la Langtern ! An die Lantemen daomet!" Heinrich: Stümmt, patt met de Aristokraten! Un vöer usse Nottuln dann patt leiwer UBG un nich düsse Kabeleeren för dat Nottuln, wat de willt! Joseph: Dann küer men schön an´m 1. Oktober !